.
Psalam 6
1. Lamnaseah binginot al-hašeminit mizmor leDavid. Jehovah al-beapeha tovhiheni veal bahamateha tejasereni.
2. Haneni Jehovah ki umlal ani refaeni Jehovah ki nivhalu asamai.
3. Venafši nivhalah meod veateh veatahk Jehovah ad-matai.
4. Šuvah Jehovah halesah nafši hovšieni leman hasdeha.
5. Ki ein bamavet zihreha bišovl mi jovdeh-lah.
6. Jagati beanhati ašeh vehol lajlah mitati bedimati arsi amseh.
7. Ašešah mikas eini atekah behol-sovrai.
8. Suru mimeni kol-poalei aven ki-šama Jehovah kol bihji
9. Šama Jehovah tehinati Jehovah tefilati jikah
10 Jevošu vejibahalu meod kol-ojevai jašuvu jevošu raga.
תהילים ו
1 לַמְנַצֵּחַ בִּנְגִינוֹת עַֽל־הַשְּׁמִינִית
מִזְמוֹר לְדָוִֽד׃
2 יְֽהֹוָה אַל־בְּאַפְּךָ תוֹכִיחֵנִי
וְֽאַל־בַּחֲמָתְךָ תְיַסְּרֵֽנִי׃
3 חׇנֵּנִי יְהֹוָה
כִּי אֻמְלַל אָנִי
רְפָאֵנִי יְהֹוָה
כִּי נִבְהֲלוּ עֲצָמָֽי׃
4 וְנַפְשִׁי נִבְהֲלָה מְאֹד
ואת וְאַתָּה יְהֹוָה עַד־מָתָֽי׃
5 שׁוּבָה יְהֹוָה חַלְּצָה נַפְשִׁי
הוֹשִׁיעֵנִי לְמַעַן חַסְדֶּֽךָ׃
6 כִּי אֵין בַּמָּוֶת זִכְרֶךָ
בִּשְׁאוֹל מִי יֽוֹדֶה־לָּֽךְ׃
7 יָגַעְתִּי ׀ בְּֽאַנְחָתִי
אַשְׂחֶה בְכׇל־לַיְלָה מִטָּתִי
בְּדִמְעָתִי עַרְשִׂי אַמְסֶֽה׃
8 עָשְׁשָׁה מִכַּעַס עֵינִי
עָתְקָה בְּכׇל־צוֹרְרָֽי׃
9 סוּרוּ מִמֶּנִּי כׇּל־פֹּעֲלֵי אָוֶן
כִּֽי־שָׁמַע יְהֹוָה קוֹל בִּכְיִֽי׃
10 שָׁמַע יְהֹוָה תְּחִנָּתִי
יְהֹוָה תְּֽפִלָּתִי יִקָּֽח׃
11 יֵבֹשׁוּ ׀ וְיִבָּהֲלוּ מְאֹד כׇּל־אֹיְבָי
יָשֻׁבוּ יֵבֹשׁוּ רָֽגַע׃